Дар доираи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Вилояти Мухтори Кӯҳистони Бадахшон, инфрасохтори тандурустии ноҳияи Мурғоб ба марҳалаи сифатан нав ворид шуд. Бо мақсади таъмини дастрасии сокинони баландкӯҳ ба хизматрасонии босифати тиббӣ, як Маркази муосири саломатӣ дар ҷамоати деҳоти Ғоҷо Бердибаев расман ба истифода дода шуд.
Ин иншооти ҳаётан муҳим дар доираи сиёсати созандаи давлат ва таҳкими инфрасохтори иҷтимоӣ бунёд ёфта, бо ҳузури Раиси Кумитаи ҳифзи муҳити зисти назди Ҳукумати Ҷумҳурии Тоҷикистон ва Роҳбарияти ноҳияи Мурғоб ба фаъолият оғоз намуд. Ин рӯйдод нишон медиҳад, ки рушди соҳаи тандурустӣ ва беҳтар кардани сифати зиндагии сокинони нуқтаҳои марзии кишвар дар маркази таваҷҷуҳи хоси Роҳбарияти олии мамлакат қарор дорад.
Маркази нави саломатӣ бо назардошти стандартҳои замони нав ва иқлими хоси баландкӯҳ сохта шуда, бо таҷҳизоти зарурӣ ва шароити мусоиди корӣ таъмин гардидааст. Ифтитоҳи ин муассисаи тиббӣ имкон медиҳад, ки сокинони ҷамоат ва деҳоти атрофи он бе ташриф овардан ба маркази ноҳия, дар маҳалли зисти худ аз ёрии аввалияи тиббию санитарӣ ва машварати табибон сари вақт бархурдор шаванд.
Аҳамияти стратегии ин иншоот дар шароити хоси Мурғоб ниҳоят зарур аст, зеро он кафолати саломатии сокинон, коҳиши бемориҳо ва таҳкими амнияти маънавию иҷтимоии минтақаҳои марзиро таъмин мекунад. Имрӯз Мурғоб таҳти сояи сиёсати инсонпарваронаи Пешвои миллат на танҳо марзи амни ватан, балки рамзи созандагӣ, адолати воқеии иҷтимоӣ ва рушди устувори соҳаи тандурустӣ мебошад.
